「李明窗,明仔載若閣袂記得紮水彩,共我試看覓!」佇全班同學的面頭前,老師唱聲矣!
連紲兩禮拜的畫圖課,挩窗攏袂記得紮水彩,姑不而將愛佮同學借。挩窗就是遮爾仔散形,老師看袂落去,共罵甲臭頭。
欲散學進前,挩窗佇手底寫兩字「水彩」,想講按呢就會記得。無疑悟,轉去厝的半中途,伊就袂記得了了。看著路邊有草蜢仔就去掠、蝶仔咧飛就去欱,聽著四跤仔聲就落田去巡,耍甲跤手全爛塗。落尾,去圳溝洗跤手,洗啊洗看著手底兩字「水彩」,煞來緊張,想起老師的警告⋯⋯
挩窗感覺刺疫,就共頷領弄弄予涼,香火拈出來。
你臆?發生啥物代?
挩窗敢若聽著有聲咧共叫,田庄路無人嘛無車,怪奇咧!遐有真濟刺查某,挩窗行倚,白色的花蕊若放送頭,直直播送:「挩窗,愛會記得紮水彩喔!」
伊耳仔擽擽咧,想講敢有聽毋著去。這時,有一隻班鴿飛落來,搖搖擺擺行過來,喙開開閣會曉講話:「ku!ku!ku!ku!愛會曉紮水彩喔!」
「唉唷!看著鬼!緊旋!」伊冊包仔揹咧,就傱轉去阿無庄。
挩窗毋敢轉去厝,驚老師敲電話共阿媽講,不如先去廟遐拜拜,予伊的記持較好咧,較袂無頭神。
廟口猶原一个囡仔攏無,挩窗共冊包仔掛踮石獅的頷頸,迒過戶橂去拜拜:「神明啊!我有代誌欲拜託⋯⋯」伊話拄講,神明的目睭竟然褫開,指示講:
「你愛會記得紮水彩啦!」
「啥物!神明嘛講話矣!哇哩咧!」挩窗斡頭欲來走,去取冊包仔的時陣,石獅仔嘛開喙:「水彩!水彩!水彩!」
挩窗旋轉去厝,隨共水彩盒仔僥出來,抱牢牢,掠準按呢就無事矣!
阿媽無佇厝,暗頓已經攢便便,挩窗身軀洗好,共桌崁掀起來,貯飯配菜來食。勻仔食挩窗勻仔聽著聲⋯⋯噫!勤儉的阿媽出門袂記得關收音機,按呢真了電喔!挩窗欲去共關掉,發現收音機無插電,空中主持人按呢講:「現代人代誌濟、厚操煩,定定拍交落,親像挩窗,你水彩愛會記得紮去學校喔!」
挩窗驚甲共水彩抱咧,衝去家己的房間,覕踮被內底。
無偌久,就去予阿媽掀開矣!
「阿媽,我知!明仔載⋯⋯明仔載我⋯⋯我⋯⋯一定紮水彩去學校!」
「戇囡仔!你是咧練啥物痟話!我是欲講!你身軀洗未?飯食飽未?」
「有啦!有啦!」
「按呢就較早睏咧!」
阿媽共房間的電火切掉,挩窗毋敢閣烏白走,就佇眠床頂睏去矣!
天拍殕仔光,鳥仔聲共挩窗吵起來,伊目睭挼挼咧去看窗仔外,日頭拄對山的後壁面浮出來,有兩蕊目睭掛一支喙,出聲講:「早時去學校,愛會記得紮水彩喔!」
「我知啦!莫閣講啊!我欲起痟啦!」挩窗對眠床躘起來,拚去大廳,聽著有人咧挵門,拍開,門口有鐵牛伯仔、龍眼媽、村長、風水嬸仔⋯⋯規庄百偌人齊到,講的當然嘛是彼句話:「噫!愛會記得紮水彩喔!」
「我知矣啦!以後毋敢啦!」挩窗冊包仔捎咧,就對學校遐去。
彼咧,水彩猶原囥踮厝內,閣袂記得紮矣啦!
(漢字與拼音依教育部台灣閩南語辭典)
作者簡介:鄭順聰
作家。著有《時刻表》、《家工廠》、《海邊有夠熱情》、《晃遊地》、《基隆的氣味》、《黑白片中要大笑》。現正於SOS連載台語神怪冒險小說:挩窗去弄險。